Վերջապես
Չնայած կիզիչ արեւին բազմաթիվ մարդիկ ՚Ազատությունՙ, ՚Ազատ, անկախ, Հայաստանՙ վանկարկումներով շարունակում են շարժվել Մատենադարանի ուղղությամբ: Այժմ Մատենադարանի ամբողջ տարածքը, Մատենադարանից մինչեւ Կոմիտասի անվան Կոնսերվատորիա տանող մայթերը մարդաշատ են, լեփ-լեցուն են անգամ հարակից սրճարանները:
Հավաքվածները տարբեր մասնագիտությունների տեր մարդիկ են` դասախոսներից սկսած մինչեւ հասարակ գյուղացիներ: Քիչ թիվ չի կազմում նաեւ երիտասարդությունը:
Երեւանի պետական համալսարանի ամբիոններից մեկի ողջ դասախոսական կազմը ներկայացել էր հանրահավաքին, իսկ թե ինչո՞ւ, դասախոսները առանց ներկայանալու ՚Ա1+ՙ-ին ասացին. ՚Ի վերջո, արթնացավ ժողովրդի ոգին, ու մենք միահամուռ պետք է հասնենք հաղթանակի: Այս ոգին ոչ միայն Ռոբերտ Քոչարյանին, այլ նաեւ Սերժ Սարգսյանին չի հաջողվի քնեցնել, էլ չեմ ասում սպանել: Նրանք ժողովրդի կոկորդին են հասցրելՙ: Ապա հավելեցին. ՚Մեզ ուսյալ, կիրթ ղեկավարներ են հարկավորՙ:
Կոտայքի մարզից տաքսիով հանրահավաքի եկած Արմեն Աղասյանը իր ներկայությունը մեկնաբանեց. ՚Այսքան մարդ ուղղակի չէր կարող սխալվել: Նրանք իմիտացիա անելով` չեն կարող համոզել, թե երկրի վիճակը լավացնում են: Ասա, լավացնող եք, բա ինչից եք վախենում ու փակել եք մարզային բոլոր ճանապարհները: Էդ վախկոտի պահվածք էՙ:
Ազատամարտիկ Արտաշեսն էլ նշեց. ՚Ես ունեմ գաղափարներ ու մինչեւ վերջ կմնամ դրան հավատարիմ: Եթե ինքս համոզվեմ, որ այս իշխանությունները դրական քայլեր են անում, միայն այդ դեպքում կանտեսեմ կեղծված ընտրությունների արդյունքները, սակայն արդեն իսկ պարզ է , որ որեւէ դրական բան չի արվում, հակառակը` հարյուրավոր քաղբանտարկյալներ շարունակում են անազատության մեջ մնալՙ:
Առաջին նախագահ Լեւոն Տեր-Պետրոսյանին ժողովուրդը ցնծությամբ դիմավորեց: Մարդիկ վազում էին նրան ընդառաջ, փորձում էին բարեւել:
Մարդիկ սկսեցին միահամուռ վանկարկել. ՚Լեւոն, նախագահՙ: Ծափերով նրան բարձրացրեցին մինչեւ բեմահարթակ եւ անհամբերությամբ սպասում էին նրա ելույթին:
Ի դեպ, շատերը հեռախոսով տեղեկատվություններ են հաղորդում իրենց հարազատներին:
Հանրահավաքը մի քանի րոպե առաջ մեկնարկեց:
|