Հունիս 1
Կիրակի օրը Հյուսիսայինում խիստ բազմամարդ էր: Մարդիկ նշում էին միանգամից երկու տոն` երեխաների պաշտպանության օրն ու Նիկոլ Փաշինյանի ծննդյան 33-ամյակը: «Հատուկ գունդ» երիտասարդական շարժումը տոնական օրվան պատրաստվել էր հիմնովին` փուչիկներ, գունավոր գլխարկներ, նվերներ ու քաղաքական պամֆլետներ, որոնք բաժանվեցին երեխաներին, իսկ ամենակարեւորը` տորթ, որի վրա գրված էր «1+1+1+1...=33»:
«Մենք երեխաներին պատրաստվում ենք նվիրել նվեր-տուփեր` թվով 33 հատ, որոնց մեջ կա մեկական կոնֆետ ու թուղթ` վրան գրված «ազատություն»: Մենք շուտով հաղթելու ենք ու ազատություն ենք նվիրելու Հայաստանի բոլոր երեխաներին ու մեծերին», - ասաց հատուկգնդեցի Շահանեն: Տոնական տորթի մոմերը փչեցին երեխաները, որից հետո Նիկոլի հորաքույրը կտրեց այն ու բաժանեց երեխաներին: Գնդեցիները որոշեցին տորթ հյուրասիրել նաեւ Հյուսիսայինի ոստիկաններին, որոնք, սակայն, առանձնակի դաժանությամբ մերժեցին համտեսել տորթը: Մարդիկ շնորհավորում էին երեխաներին` խոստանալով, որ շուտով նրանք ապրելու են որակապես այլ Հայաստանում, որտեղ երեխաների իրավունքները կլինեն պաշտպանված: Իսկ Նիկոլին մաղթում էին առողջություն ու շուտափույթ վերադարձ` երկրի հակառակ կողմից: Երեխաները մեծ ոգեւորությամբ գոռում էին Շարժման մշտական կարգախոսները, որոնց ավելացել էր եւս մեկը` «Նի-կոլ Փա-շին-յան»:
Նրանք պողոտայում նաեւ նկարում էին կավիճներով` հիմնականում խաղաղության աղավնի եւ ճաղերի ետեւում գտնվող հերոսներ ու քաղբանտարկյալներ: Պողոտայում էր Երվանդ Մանարյանը, որը մեծ ուրախությամբ լուսանկարվեց երեխաների հետ:
Տոնին լրջորեն եւ հիմնավոր պատրաստվել էր նաեւ «Հայոց կանանց շարժում»-ը, որի ներկայացուցիչները խմորեղեններ էին բերել ու հյուրասիրում էին երեխաներին, անցորդներին: Իսկ «Հիմա» երիտասարդական նախաձեռնությունը թղթե տորթ էր պատրաստել, որը զվարճացրեց հատկապես հայրենի ոստիկաններին: Տոնը եզրափակվեց հատուկգնդեցիների կողմից կազմակերպված հրավառությամբ, որից հետո քաղաքացիները շարժվեցին դեպի ՀՀՇ վարչության շենք` իրենց զորակցությունը հայտնելու հացադուլավորներին:
|