Հատուկ Գնդի Հատուկ Նշանակությունը
“Հատուկ Գունդ” երիտասարդական նախաձեռնության անդամները չեն դավաճանում ավանդույթներին և շարունակում են կատարել իրենց “Հատուկ” Նշանակությունը: Հունիսի 6-ին, ուրբաթ օրը, խմբի անդամները միահամուռ այցելեցին Եռաբլուր ու մեծ անակնկալ մատուցեցին այնտեղ գտնվող հացադուլավորներին: Արդեն իսկ հայտնի է, որ հացադուլավորները այնտեղ փոխարինում են միմյանց ամեն 3 օրը մեկ: Նրանք շատ ուրախ էին արդեն բավականին ակտիվ գործունեություն ծավալող “Հատուկ Գունդ” անունը կրող նախաձեռնության երիտասարդ անդամների այցելությանը:
Այստեղ գնդեցիները հացադուլավորներին են հանձնել իրենց ավանդական թևկապ-դրոշակները, ծխախոտ են բաժանել, իրենց այցելությամբ ու կոչերով, որ երիտասարդությունը շարունակում է պայքարել, հաղորդել են նրանց երիտասարդ անսասան ոգու շունչը, իսկ ամենակարևորը, բավականին հետաքրքիր ժամանակ են անցկացրել` արդեն իսկ հայտնի դարձած քաղաքական բնույթ կրող բանաստեղծություններն արտասանելով:
Սակայն պետք չէ մոռանալ, որ սա գնդեցիների նախաձեռնած ընդամենը հերթական ակցիան էր:
Հիրավի, շարժման մեծ, կարելի է ասել կարևորագույն ուժերից մեկը հենց երիտասարդությունն է, որն այս պարագայում լիովին արդարացնում է մեծահասակների սպասելիքներն ու հույսերը:
“Հատուկ Գունդ” երիտասարդական նախաձեռնության անդամները մեծ հարգանքով պահում ու չեն դավաճանում իրենց արդեն ձևավորված գաղափարներին: Իսկ դրանցից մեկն է` աջակցել հացադուլավորներին իրենց ներկայությամբ և թույլ չտալ, որպեսզի նրանք ընկճվեն: Հունիսի 6-ի ակցիան ավելորդ անգամ ապացույց հանդիսացավ, որ նրանք պատվով են կատարում իրենց Հատուկ Նշանակությունը` հայտնվելով ճիշտ ժամանակ, ճիշտ տեղում:
Մեր այս անմահ ու հաղթական պայքարի հիշարժան, փառավոր օրերում բազմաթիվ հայորդիներ իրենք իրենց տալիս են նույն հարցը. երբևէ հայերը նույնքան համախմբված ու միահամուռ եղել են արդյոք պատմության ընթացքում: Այս հարցը թերևս բոլորս էլ ինքներս մեզ տվել ենք վերջին ժամանակներում: Գուցե ճիշտ ժամանակն է, որ այդ հարցը տան իրենք իրենց այն ուժերը, որոնց դեմ էլ հենց պայքարի է ելել ժողովուրդը: Եվ, ով գիտի, գուցե գտնեն պատասխանը: Կամ էլ արդեն գտել են, սակայն չեն ցանկանում ականջ դնել աղաղակող բազմության կոչերին ու չեն ցանկանում հասկանալ, որ իրենց ժամանակը սպառվել է:
Այսպիսով` եկել է մեր ժամը, Հաղթանակի ու Ազատության ժամը:
|