Ազատ, Անկախ ՕՊԵՐԱ !
«Քաղաքական զբոսանքը» Հյուսիսային պողոտայում, չնայած անբարենպաստ եղանակին, երեկ եւս անցավ ավանդական ռեժիմով: Հավաքվածների ուշադրության կենտրոնում երեկ «Հատուկ գունդ» երիտասարդական շարժման ակտիվիստներն էին:
Նրանք երեկ ցերեկը մայրաքաղաքի կենտրոնից հունիսի 20-ին կայանալիք Համաժողովրդական Շարժման հանրահավաքի մասին իրազեկման երթ էին կազմակերպել, սակայն «Հատուկ գնդի» երիտասարդներին անմիջապես մոտեցել են ոստիկանության աշխատակիցները, պահանջել...թաքցնել եռագույն դրոշները եւ ցուցապաստառները` ցնցող պատճառաբանությամբ, թե` «դրոշը կոչ է եւ երթի նշան»: Երիտասարդները, սակայն, շարունակել են հանրահավաքի իրազեկման թռուցիկներ բաժանել անցորդներին, այնուհետեւ փորձել են մտնել Ազատության հրապարակ, որտեղ նախատեսել էին ակցիա անցկացնել` «Հանրահավաքին մնացել է 8 օր» նախադասությունը ներկայացնելով հրապարակում, սակայն ոստիկանները փակել էին Ազատության հրապարակը` արգելելով նրանց մուտքը: Այնուհետեւ երիտասարդները շարժվեցին Հյուսիսային պողոտա-Թումանյան փողոցների հատված, որտեղ սկսեցին վանկարկել` «Ազատ, անկախ օպերա»: Քիչ անց նրանց միացան «Հյուսիսայինում» հավաքվածները: Իսկ ժամը 20-ից հետո «քաղաքական զբոսանքի» մասնակիցները եւ «Հատուկ գունդ» երիտասարդական շարժման ակտիվիստները` «Ազատություն» վանկարկելով եւ ոստիկանության արգելած ցուցապաստառներով երթով շարժվեցին դեպի ՀՀՇ գրասենյակ:
|