«Քաղաքական զբոսանքի» մասնակիցները մի քանի րոպե շարունակ ծափահարում եւ «Հաղթանակ», «Ազատություն», «Պայքար, պայքար, մինչեւ վերջ», «Ազատ, անկախ Հայաստան», «Լեւոն` նախագահ» էին վանկարկում, շնորհավորում արդեն ազատության մեջ գտնվողներին` շամպայնով: Մասիս Այվազյանը մեզ հետ զրույցում նշեց, որ ժողովրդի այս ուժն ու կամքը զգում էին, երբ անազատության մեջ էին, զգում էին պայքարի ոգին: Հարցին, թե Համաժողովրդական Շարժման ապագան ինչպե՞ս է տեսնում, Մ.Այվազյանը պատասխանեց` «Փայլուն...»:

Երեկ «Հյուսիսայինում» էին նաեւ «Հատուկ գունդ» երիտասարդական շարժման ակտիվիստները, ովքեր դարձյալ իրենց դրոշներով եւ «Հունիսի 20-ին հանրահավաք, Ազատության հրապարակ. Մենք վերադառնում ենք» ցուցապաստառով ակցիան անցկացրին: «Հատուկ գնդից» յուրաքանչյուրը` «Մնացել է 7 օր» տառերն էր խորհրդանշում: Երիտասարդները շարքով կանգնեցին Ազատության հրապարակի դիմացի մայթին` Հյուսիսային պողոտայի կողմից եւ սկսեցին վանկարկել` «Ազատ, անկախ օպերա», «Մտնելու ենք», «Հաղթելու ենք», «Լեւոն` նախագահ», «Սերժիկ, հեռացիր»: Ոստիկանության աշխատակիցները տեսնելով երիտասարդներին` նախ անմիջապես փակեցին Ազատության հրապարակի մուտքը, թեեւ «Հատուկ գնդեցիները» մտադրություն չունեին մտնել Ազատության հրապարակ: Երիտասարդներին միացան «քաղաքական զբոսանքի» մասնակիցները եւ ուժգնացան` «Լեւոն` նախագահ», «Սերժիկ, հեռացիր», «Հաղթելու ենք» վանկարկումները, որոնց ազդանշաններով միանում էին նաեւ Թումանյան փողոցով անցնող վարորդները: Սա էլ նկատելով` ոստիկանները արդեն հայտնվեցին Հյուսիսային պողոտայի մայթում, իսկ հավաքվածները շարունակեցին ավելի ուժգին վանկարկել` «Պայքար, պայքար, մինչեւ վերջ», «Ազատ, անկախ Հայաստան»: Ոստիկաններին մի քանի րոպե լարված պահելուց հետո հավաքվածները «Հյուսիսայինից» երթով շարժվեցին դեպի ՀՀՇ: